ಪಿ.ಆರ್.ಕೆ. ಈ ಬ್ಯಾನರ್ ಶುರುವಾಗಿದ್ದೇ ಹೊಸ ಪ್ರತಿಭೆಗಳಿಗಾಗಿ. ಹೊಸ ಕಥೆಗಳಿಗಾಗಿ. ಅದರಲ್ಲಿ ಬಹುಪಾಲು ಗೆದ್ದಿದ್ದ ಪುನೀತ್, ಹಲವು ಚಿತ್ರಗಳಿಗೆ ಚಾಲನೆ ಕೊಟ್ಟಿದ್ದರು. ಕವಲುದಾರಿ, ಮಾಯಾ ಬಜಾರ್, ಲಾ ಮತ್ತು ಫ್ರೆಂಚ್ ಬಿರಿಯಾನಿ ತೆರೆ ಕಂಡಿದ್ದವು.

ಲಿಖಿತ್ ಶೆಟ್ಟಿ, ಅಮೃತಾ ಅಯ್ಯಂಗಾರ್ ನಟನೆಯ ಫ್ಯಾಮಿಲಿ ಪ್ಯಾಕ್, ಡಾನಿಷ್ ಸೇಠ್ ಜೊತೆಗೆ ಒನ್ ಕಟ್ ಟು ಕಟ್, ರಾಮಾ ರಾಮಾ ರೇ ಸತ್ಯಪ್ರಕಾಶ್ ಜೊತೆ ಮ್ಯಾನ್ ಆಫ್ ದಿ ಮ್ಯಾಚ್ ಚಿತ್ರಗಳು ರಿಲೀಸ್ ಆಗಬೇಕಿವೆ. ಇದರ ಮಧ್ಯೆ ಅಶಿಕಾ ರಂಗನಾಥ್, ಪ್ರವೀಣ್ ತೇಜ್ ಅಭಿನಯದ 02 ಶುರುವಾಗಿತ್ತು. ಅಕ್ಟೋಬರ್ 8ರಂದು ಮುಹೂರ್ತವೂ ಆಗಿತ್ತು. ಪುನೀತ್ ನಿಧನದಿಂದಾಗಿ ಸ್ಥಗಿತಗೊಂಡಿದ್ದ ಚಿತ್ರದ ಚಿತ್ರೀಕರಣಕ್ಕೆ ಮತ್ತೆ ಉಸಿರು ಕೊಟ್ಟಿದ್ದಾರೆ ಅಶ್ವಿನಿ ಪುನೀತ್, ಜನವರಿ 22ರಿಂದ ಶೂಟಿಂಗ್ ಶುರುವಾಗಲಿದೆ. ಈ ಚಿತ್ರಕ್ಕೆ ಪ್ರಶಾಂತ್ ರಾಜ್ ಮತ್ತು ರಾಘವ್ ನಾಯಕ್ ನಿರ್ದೇಶಕರು.