ಅನಿಕಾ ಎಂಬ ಸುಂದರಿ ಅರೆಸ್ಟ್ ಆದ ಬೆನ್ನಲ್ಲೇ ಸ್ಯಾಂಡಲ್‍ವುಡ್ ಮತ್ತು ಡ್ರಗ್ಸ್ ಮಾಫಿಯಾ ಲಿಂಕ್ ಸುದ್ದಿ ಸಂಚಲನವನ್ನೇ ಸೃಷ್ಟಿಸಿದೆ. ಯಾರಿರಬಹುದು..? ಆ ನಟ ಯಾರು..? ಸ್ಟಾರ್ ನಟನ ಮಗ ಯಾರು..? ಆ ಸಂಗೀತ ನಿರ್ದೇಶಕರು ಯಾರ್ಯಾರು..? ಆ ನಟಿಯರು ಯಾರ್ಯಾರು..? ಹೀಗೆ ಹಲವು ಪ್ರಶ್ನೆಗಳು ಉದ್ಭವಿಸಿವೆ. ಇದರ ನಡುವೆ ಬಿರುಗಾಳಿ ಎಬ್ಬಿಸಿರೋದು ನಿರ್ದೇಶಕ ಇಂದ್ರಜಿತ್ ಲಂಕೇಶ್ ಮತ್ತು ಪ್ರಶಾಂತ್ ಸಂಬರಗಿ ಹೇಳಿಕೆಗಳು.

ಇಂದ್ರಜಿತ್ ಲಂಕೇಶ್ ಪರೋಕ್ಷವಾಗಿ ಚಿರಂಜೀವಿ ಸರ್ಜಾ ಹೆಸರು ಹೇಳದೇ, ಅವರೊಬ್ಬ ಡ್ರಗ್ಸ್ ವ್ಯಸನಿ ಎಂದು ಹೇಳಿಕೆ ಕೊಟ್ಟರು. ಸರ್ಜಾ ಕುಟುಂಬದ ಆಪ್ತರಾದ ಪ್ರಶಾಂತ್ ಸಂಬರಗಿ, ಶಿವಾರ್ಜುನ್ ಇಬ್ಬರೂ ಅದನ್ನು ನಿರಾಕರಿಸಿದ್ರು. ಶ್ರೀನಗರ ಕಿಟ್ಟಿ ಮೇಲಿನ ಆರೋಪ ನಿರಾಕರಿಸಿದ್ದು ಪತ್ರಕರ್ತ ಹಾಗೂ ಶ್ರೀನಗರ ಕಿಟ್ಟಿ ಮಾವ ರವಿ ಬೆಳಗೆರೆ. ಇದೇ ವೇಳೆ ಪ್ರಶಾಂತ್ ಸಂಬರಗಿ ಸಂಗೀತ ನಿರ್ದೇಶಕ ರಘು ದೀಕ್ಷಿತ್ ಹೆಸರು ಹೇಳಿದರು. ಆ ಆರೋಪವನ್ನು ಸ್ವತಃ ರಘು ದೀಕ್ಷಿತ್ ನಿರಾಕರಿಸಿದ್ರು. ಈಗ ಸ್ಟಾರ್ ನಟರೂ ಈ ಬಗ್ಗೆ ಮಾತನಾಡೋಕೆ ಶುರು ಮಾಡಿದ್ದಾರೆ.

ಶಿವರಾಜ್ ಕುಮಾರ್ : ನಾನಂತೂ ಇಂಡಸ್ಟ್ರಿಯಲ್ಲಿ ಡ್ರಗ್ಸ್ ಮಾಫಿಯಾ ನೋಡಿಲ್ಲ. ಇದ್ದರೂ ಅದನ್ನು ತಳ್ಳಿ ಹಾಕೋ ಆಗಿಲ್ಲ. ಹೀರೋ, ಲೀಡರ್ ಎಂದ ತಕ್ಷಣ ಏನೇನೋ ಮಾತನಾಡೋಕೆ ಆಗಲ್ಲ. ತಪ್ಪು ಮಾಡಿದ್ದವರನ್ನು ಪತ್ತೆ ಹಚ್ಚಿ ಕಾನೂನು ಪ್ರಕಾರ ಕೈಗೊಳ್ಳಲಿ.

ಉಪೇಂದ್ರ : ಡ್ರಗ್ಸ್ ದಂಧೆ ವಿಚಾರ ಕೇಳಿ ದಿಗ್ಭ್ರಮೆಯಾಗಿದೆ. ನಾನಂತೂ ಎಲ್ಲೂ ನೋಡಿಲ್ಲ. ಆರೋಪ ಮಾಡುತ್ತಿರುವವರೇ ಹೇಳಬೇಕು. ನನಗಂತೂ ಮಾಹಿತಿ ಇಲ್ಲ. ಯುವಜನತೆ ಡ್ರಗ್ಸ್‍ನಿಂದ ದೂರವಿರಬೇಕು. ನಶೆ ಶಾಶ್ವತ ಅಲ್ಲ.

ಜಗ್ಗೇಶ್ : ತಪ್ಪು ಮಾಡಿದ್ದವರನ್ನು ಹುಡುಕಿ ಬೆತ್ತಲೆ ಮಾಡಿ. ಯಾರು ವಾಮ ಮಾರ್ಗದಲ್ಲಿ ಗೆದ್ದಿರುತ್ತಾರೋ, ಅವರೇ ನಶೆಹಾದರದ ದಾಸರು. ಉಪ್ಪು ತಿಂದವರು ನೀರು ಕುಡಿಯಲೇಬೇಕು.

ರಚಿತಾ ರಾಮ್ : ನನಗಂತೂ ಮಾಹಿತಿ ಇಲ್ಲ. ನಾನಂತೂ ಡ್ರಗ್ಸ್ ತಗೊಳ್ಳಲ್ಲ. ಚಿತ್ರರಂಗದಲ್ಲಿ ಅಂತಹ ಮಾಫಿಯಾ ಇದ್ದರೂ ನಾನು ತಲೆಕೆಡಿಸಿಕೊಳ್ಳಲ್ಲ.

ಭಾವನಾ : ನನ್ನ ಗಮನಕ್ಕೆ ಬಂದಂತೆ ಸೆಟ್‍ನಲ್ಲಂತೂ ಯಾರೂ ಡ್ರಗ್ಸ್ ಸೇವನೆ ಮಾಡಿ ಬಂದಿದ್ದು ಇಲ್ಲ. ಇನ್ನು ಮಾಫಿಯಾ ಇದ್ದರೆ, ಅದಕ್ಕೆ ತುತ್ತಾಗಿರುವವರನ್ನು ಪತ್ತೆ ಹಚ್ಚಿ ಅವರನ್ನು ಸರಿದಾರಿಗೆ ತರುವ ಕೆಲಸ ಮಾಡಬೇಕು. ಜಗ್ಗೇಶ್ ಅವರು ಹೇಳೋ ಹಾಗೆ ಬೆತ್ತಲೆ ಮಾಡಬೇಕು ಎನ್ನುವುದು ಸಮರ್ಪಕ ಎಂದು ಅನಿಸುವುದಿಲ್ಲ.

ಶರ್ಮಿಳಾ ಮಾಂಡ್ರೆ : ನನಗೆ ಅಂತಹ ಅನುಭವಗಳಾಗಿಲ್ಲ. ನಮ್ಮ ತಾತ ಹಾಗೂ ತಂದೆ ಇಂಡಸ್ಟ್ರಿಯಲ್ಲಿದ್ದವರೇ. ನಿರ್ಮಾಪಕರು, ವಿತರಕರಾಗಿದ್ದವರು. ಹೀಗಾಗಿ ನನಗೆ ಇಂತಹ ವಿಚಾರಗಳ ಬಗ್ಗೆ ಯೋಚಿಸೋದಕ್ಕೂ ಸಮಯ ಇಲ್ಲ.

ಸುಧಾರಾಣಿ : ನಾವಂತೂ ಇಂತಹುದ್ದನ್ನು ನೋಡಿಲ್ಲ. ಕೇಳಿಯೂ ಇಲ್ಲ. ತಪ್ಪು ಮಾಡಿದವರಿದ್ದರೆ ಖಂಡಿತಾ ಶಿಕ್ಷೆ ಕೊಡಿಸಿ.

ಶ್ರೀನಗರ ಕಿಟ್ಟಿ : ಡ್ರಗ್ಸ್ ಮಾಫಿಯಾದಲ್ಲಿದ್ದವರನ್ನು ಹುಡುಕಿ, ನಾಲ್ಕು ತದುಕಿ ಜೈಲಿಗೆ ತಳ್ಳಿ. ಕಾನೂನು ಪ್ರಕಾರ ಶಿಕ್ಷೆ ಕೊಡಿ. ಸುಮ್ ಸುಮ್ನೆ ಮಾತಾಡೋದ್ರಿಂದ ಪ್ರಯೋಜನ ಇಲ್ಲ.

ವಿ.ನಾಗೇಂದ್ರ ಪ್ರಸಾದ್ : ನಾವು ಹಾಲಿನಷ್ಟು ಪವಿತ್ರರು, ಡ್ರಗ್ಸ್ ಬಳಕೆ ಇಲ್ಲವೇ ಇಲ್ಲ ಎಂದು ಹೇಳೋಕಾಗಲ್ಲ. ಆದರೆ ಒಂದಂತೂ ಸತ್ಯ. ದೊಡ್ಡ ದೊಡ್ಡ ನಟರಾಗಲೀ, ದೊಡ್ಡ ದೊಡ್ಡ ದೊಡ್ಡ ಸಂಗೀತ ನಿರ್ದೇಶಕರಾಗಲೀ ಈ ಜಾಲದಲ್ಲಿ ಇಲ್ಲ. ಸಿನಿಮಾವನ್ನೇ ಉಸಿರಾಗಿಸಿಕೊಂಡು ಬದುಕುತ್ತಿರುವವರು ಈ ಜಾಲದಲ್ಲಿ ಇಲ್ಲ.

ರೂಪಾ ಅಯ್ಯರ್ : ನಮ್ಮ ಇಂಡಸ್ಟ್ರಿಯಲ್ಲೂ ಇಂಥದ್ದೆಲ್ಲ ಇದೆಯಾ ಎಂದು ಭಯವಾಗುತ್ತಿದೆ. ಇದನ್ನು ನಿಲ್ಲಿಸಬೇಕು. ಸುಮ್ಮನಿರಬಾರದು.

ಕಾರುಣ್ಯ ರಾಮ್ : ನಾನೂ 10 ವರ್ಷದಿಂದ ಚಿತ್ರರಂಗದಲ್ಲಿದ್ದೇನೆ. ಈವರೆಗೂ ಇಂಥಾ ಆರೋಪಗಳನ್ನಾಗಲೀ, ಪ್ರಕರಣಗಳನ್ನಾಗಲೀ ನೋಡಿಲ್ಲ. ಕೇಳಿಲ್ಲ.

ದಯಾಳ್ ಪದ್ಮನಾಭನ್ : ಯಾರಿದ್ದಾರೆ ಅನ್ನೋದನ್ನು ಪತ್ತೆ ಮಾಡಿ, ಸುಮ್ಮನೆ ಚಿತ್ರರಂಗದ ಮೇಲೆ ಗೂಬೆ ಕೂರಿಸಬೇಡಿ. ಇಂದ್ರಜಿತ್ ಲಂಕೇಶ್ ಅವರಿಗೆ ಎಲ್ಲವೂ ಮೊದಲೇ ಗೊತ್ತಿದ್ದರೆ ಅವರು ಯಾಕೆ ಮೊದಲೇ ತಿಳಿಸಲಿಲ್ಲ. ಕಲೆಗೆ ಗೌರವ ಕೊಡುವವರು ಇಂತಹ ಕೆಲಸ ಮಾಡೋದಿಲ್ಲ.

ಸೋನು ಗೌಡ : ನನಗಂತೂ ಇಂತಹ ಅನುಭವಗಳಾಗಿಲ್ಲ. ಬೇರೆಯವರಿಗೆ ಇಂತಹ ಅನುಭವಗಳಾಗಿವೆಯೇನೋ.. ನನಗೆ ಗೊತ್ತಿಲ್ಲ. ಇದ್ದರೆ ಖಂಡಿತಾ ಶಿಕ್ಷೆ ಕೊಡಿಸಬೇಕು.

 ಅನಿಕಾ ಎಂಬ ಡ್ರಗ್ಸ್ ದಂಧೆಯ ಜಾಲದ ಯುವತಿಯ ಅರೆಸ್ಟ್, ಈಗ ಇಡೀ ಸ್ಯಾಂಡಲ್‍ವುಡ್‍ನ್ನೇ ಬೆಚ್ಚಿಬೀಳಿಸಿದೆ. ನನಗೆ ಕನ್ನಡ ಚಿತ್ರರಂಗದ ಸಂಗೀತ ನಿರ್ದೇಶಕರು ಹಾಗೂ ಕೆಲವು ನಟರು ಗಿರಾಕಿಗಳು. ಅವರಿಗೆ ನಾನು ಮಾದಕ ವಸ್ತು ಪೂರೈಸುತ್ತಿದ್ದೆ ಎಂದು ಹೇಳಿದ್ದೇ ತಡ, ಇಡೀ ಗಾಂಧಿನಗರ ಬೆಚ್ಚಿಬಿದ್ದಿದೆ.

ಡ್ರಗ್ಸ್ ಜಾಲ, ಚಿತ್ರರಂಗಕ್ಕೆ ಹೊಸ ವಿಷಯವೇನಲ್ಲ. ಡ್ರಗ್ಸ್ ದಂಧೆ ಬೀಡುಬೀಸಾಗಿ ನಡೆಯೋದು ಬಾಲಿವುಡ್‍ನಲ್ಲಿ. ಬಾಲಿವುಡ್ ಪಾರ್ಟಿಗಳಲ್ಲಿ ನಶೆಯೇರಿಸುವ ಗಾಂಜಾ, ಚರಸ್, ಹೆರಾಯಿನ್ ಸೇರಿದಂತೆ ಹಲವು ಡ್ರಗ್ಸ್ ಈಸಿಯಾಗಿ ಸಿಗುತ್ತವೆ. ಎರಡು ವರ್ಷಗಳ ಹಿಂದೆ ತೆಲುಗು ಚಿತ್ರರಂಗದಲ್ಲೂ ಇದು ಬಿರುಗಾಳಿ ಸೃಷ್ಟಿಸಿತ್ತು. ತೆಲುಗು ಚಿತ್ರರಂಗದ ಸಿ ಮತ್ತು ಡಿ ಗ್ರೇಡ್‍ನ ಕೆಲವು ನಟ, ನಟಿಯರು ಅರೆಸ್ಟ್ ಆಗಿದ್ದೂ ಆಯ್ತು. ಆದರೆ.. ಮುಂದೇನಾಯ್ತು..? ಗೊತ್ತಿಲ್ಲ.

ಹಿಂದಿ ಚಿತ್ರರಂಗದಲ್ಲಿ ಸಿನಿಮಾ ಮತ್ತು ಮಾಡೆಲಿಂಗ್ ಪಾರ್ಟಿಗಳಲ್ಲಿ ಡ್ರಗ್ಸ್ ದಂಧೆ ನಡೆಯುತ್ತದಾದರೂ, ಇದುವರೆಗೆ ಸ್ಟಾರ್‍ಗಳ್ಯಾರೂ ಸಿಕ್ಕಿಬಿದ್ದಿಲ್ಲ. ಬಾಲಿವುಡ್ ಪಾರ್ಟಿಗಳಲ್ಲಿ ಡ್ರಗ್ಸ್ ಕಾಮನ್ ಇದೀಗ ತಾನೆ ಕಾಂಟ್ರವರ್ಸಿ ಕ್ವೀನ್ ಕಂಗನಾ ರಾವತ್ ಸ್ಫೋಟಿಸಿದ್ದಾರೆ. ಆದರೆ.. ಇಂತಾದ್ದೊಂದು ದಂಧೆ ಸ್ಯಾಂಡಲ್‍ವುಡ್‍ನಲ್ಲೂ ಇದೆಯಾ..?

ಮಾದಕ ವಸ್ತು ತನಿಖಾ ವಿಭಾಗವೇ ಹೇಳಿರೋದ್ರಿಂದ ಸಂಗೀತ ನಿರ್ದೇಶಕ ಹಾಗೂ ನಟ, ನಟಿಯರು ಡ್ರಗ್ಸ್ ಜಾಲದಲ್ಲಿ ಇದ್ದರೂ ಇರಬಹುದೇನೋ.. ಯಾರು ಅನ್ನೋದನ್ನು ತನಿಖೆ ಒಂದು ಹಂತಕ್ಕೆ ಬಂದು ಸಾಕ್ಷ್ಯ ಸಿಗುವವರೆಗೆ ಹೇಳೋಕಾಗಲ್ಲ.

ಈಗಾಗಲೇ ಚಿತ್ರರಂಗದ ಗಣ್ಯರು, ನಟ, ನಟಿಯರು ಶಾಕ್ ಆಗಿದ್ದಾರೆ. ಅಂತಹುದ್ದೇನೂ ಕನ್ನಡ ಚಿತ್ರರಂಗದಲ್ಲಿ ನಡೆಯಲ್ಲ ಅನ್ನೋದು ಅವರೆಲ್ಲರ ಒಕ್ಕೊರಲ ಮಾತು. ಕನ್ನಡ ಚಿತ್ರರಂಗದ ಜರ್ನಿಯ ಅರ್ಧ ಹಾದಿಯಲ್ಲಿ ಚಿತ್ರಲೋಕವೂ ಜೊತೆ ಜೊತೆಯಾಗಿಯೇ ಸಾಗಿ ಬಂದಿದೆ.

ಸ್ಯಾಂಡಲ್‍ವುಡ್‍ನಲ್ಲಿ ಪಾರ್ಟಿಗಳು ನಡೆಯುತ್ತವೆ. ಗುಂಡು, ತುಂಡು, ಡ್ಯಾನ್ಸ್ ಕಾಮನ್. ಆದರೆ ಅಂತಹ ಪಾರ್ಟಿಗಳೂ ಎಲ್ಲಿಯೂ ಎಲ್ಲೆ ಮೀರೋದಿಲ್ಲ. ಸಭ್ಯತೆಯ ಗಡಿ ದಾಟೋದಿಲ್ಲ ಅನ್ನೋದು ಚಿತ್ರಲೋಕದ ಕಣ್ಣಿಗೆ ಬಿದ್ದಿರೋ ಸತ್ಯ. ಮಾತುಗಳು ಭರ್ಜರಿಯಾಗಿರುತ್ತವೆ.. ಕೂಗಾಟ.. ಚೀರಾಟಗಳೂ ನಡೆಯುತ್ತವೆ. ಇಂತಹ ಪಾರ್ಟಿಗಳಲ್ಲಿ ನಗು.. ಅಳು.. ತಪ್ಪೊಪ್ಪಿಗೆ.. ಎಲ್ಲಕ್ಕೂ ಸಾಕ್ಷಿಯಾಗಿದೆ ಚಿತ್ರಲೋಕ. ಆದರೆ.. ಡ್ರಗ್ಸ್ ದಂಧೆ ಕಂಡಿಲ್ಲ. ಇನ್ನು ಚಿತ್ರರಂಗ ಈಗ ಹರಡಿ ಹಂಚಿ ಹೋಗಿರೋದ್ರಿಂದ.. ಯಾರ್ಯಾರೋ ಬರ್ತಿರೋದ್ರಿಂದ.. ಇನ್ಯಾವುದೋ ಮೂಲೆಯಲ್ಲಿ ಇದ್ದರೂ ಆಶ್ಚರ್ಯವಿಲ್ಲ. ಮುಖ್ಯವಾಹಿನಿಯಲ್ಲಿರೋ ಕಲಾವಿದರು, ತಂತ್ರಜ್ಞರಂತೂ ಈ ದಂಧೆಯಲ್ಲಿಲ್ಲ. ಇನ್ನು ಅಂತಹವರಿದ್ದರೆ, ಸಾಕ್ಷಿ ಸಿಕ್ಕರೆ ಹೆಡೆಮುರಿ ಕಟ್ಟೋದೇ ಒಳ್ಳೆಯದು.

ಏಕೆಂದರೆ ಎಲ್ಲರೂ ಮರೆತಿರೋ ಒಂದು ವಿಷಯವೇನಿದೆ ಗೊತ್ತೇ.. ಎಲ್ಲರೂ ಅನಿಕಾ ಹೇಳಿರೋ ಯಾರೋ ಇಬ್ಬರು ಸಂಗೀತ ನಿರ್ದೇಶಕರು, ನಟ, ನಟಿಯರ ಬಗ್ಗೆಯೇ ಯೋಚಿಸುತ್ತಿದ್ದಾರೆ. ಆದರೆ.. ಅನಿಕಾ ಬಾಯ್ಬಿಟ್ಟಿರೋ ಸತ್ಯದಲ್ಲಿ ಅದಕ್ಕಿಂತಲೂ ಭಯಾನಕವಾದ ವಿಷಯವೊಂದಿದೆ. ಬೆಂಗಳೂರಿನಲ್ಲಿ ಆಕ್ಟಿವ್ ಆಗಿರೋ ಡ್ರಗ್ಸ್ ಜಾಲ, ಬೆಂಗಳೂರಿನ ಪ್ರತಿಯೊಂದು ಕಾಲೇಜುಗಳನ್ನೂ ರೀಚ್ ಆಗಿದೆ. ವಿದ್ಯಾರ್ಥಿಗಳು ಡ್ರಗ್ಸ್ ದಾಸರಾಗಿದ್ದಾರೆ.

ಚಿತ್ರರಂಗದ ಒಬ್ಬರೋ ಇಬ್ಬರೋ ಡ್ರಗ್ಸ್ ಚಟಕ್ಕೆ ಬಿದ್ದಿದ್ದರೆ ಹಾಳಾಗಿ ಹೋಗಲಿ. ಶಿಕ್ಷೆಯೂ ಆಗಲಿ. ಆದರೆ ನಟ, ನಟಿಯರ ಗ್ಲಾಮರ್ ಮತ್ತು ಡ್ರಗ್ಸ್ ದಂಧೆಯ ಕುತೂಹಲದ ಮಧ್ಯೆ ಎಲ್ಲರೂ ಮರೆಯುತ್ತಿರೋದು ಏನು ಗೊತ್ತೇ..? ಕಾಲೇಜುಗಳಲ್ಲಿ ಡ್ರಗ್ಸ್ ದಂಧೆಕೋರರು ಬೇರು ಬಿಟ್ಟಿರೋದು. ಇನ್ನೂ ನಾವು ನಟ, ನಟಿಯರ ವಿಷಯಕ್ಕೇ ತಲೆಕೆಡಿಸಿಕೊಂಡು ಕೂತರೆ, ನಮ್ಮ ಮಕ್ಕಳ ಭವಿಷ್ಯದ ಬಗ್ಗೆ ತಲೆಕೆಡಿಸಿಕೊಳ್ಳೋದು ಯಾರು..? ಸ್ಸೋ.. ವಿಷಯ ಇಷ್ಟೆ.. ನಿಜಕ್ಕೂ ತಲೆಕೆಡಿಸಿಕೊಳ್ಳಬೇಕಿರೋದು ಡ್ರಗ್ಸ್ ಗ್ಯಾಂಗ್, ಕಾಲೇಜುಗಳಲ್ಲಿ ಕಾಲಿಟ್ಟಿರೋದ್ರ ಬಗ್ಗೆ. ಬಿ ಕೇರ್‍ಫುಲ್. ಚಿತ್ರರಂಗದ ಗಣ್ಯರೂ ಅಷ್ಟೆ, ಈ ವಿಷಯದಲ್ಲಿ ಮಾತನಾಡಿ ಜಾಗೃತಿ ಮೂಡಿಸಿದರೆ ಒಳ್ಳೆಯದು.

ಕೆ.ಎಂ.ವೀರೇಶ್,

ಸಂಪಾದಕರು

ಚಿತ್ರಲೋಕ.ಕಾಮ್