` Uma Column 48 - ಅನಂತಮೂರ್ತಿಯವರು ಕುಪ್ಪಣ್ಣನಾದ ಕತೆ - chitraloka.com | Kannada Movie News, Reviews | Image

User Rating: 0 / 5

Star inactiveStar inactiveStar inactiveStar inactiveStar inactive
 
u r ananthamurthy image
u r ananthamurthy

ಟೀವಿ ನೋಡುತ್ತಿದ್ದೆ, ಎಲ್ಲಾ ಚಾನೆಲ್ಲುಗಳಲ್ಲೂ ಅನಂತಮೂರ್ತಿಯವರ ಕುರಿತಾದ ಕಾರ್ಯಕ್ರಮಗಳು ಪ್ರಸಾರವಾಗುತ್ತಿದ್ದವು. ಫೇಸ್ ಬುಕ್ ನೋಡಿದೆ, ಅಸಂಖ್ಯ ಪೋಸ್ಟುಗಳು, ಎಲ್ಲವೂ ಅನಂತಮೂರ್ತಿಯವರ ಕುರಿತಾದದ್ದೇ. ಟ್ಟೀಟರ್ ನಲ್ಲೂ ನೂರಾರು ಸಂತಾಪಸೂಚಕ ಸಂದೇಶಗಳು ಹರಿದಾಡುತ್ತಿದ್ದವು. ಹದಿನೆಂಟು ವರ್ಷದ ಹುಡುಗನಿಂದ ಹಿಡಿದು ಎಂಭತ್ತರ ವಯೋವೃದ್ಧರ ತನಕ ಎಲ್ಲರ ಮನಸ್ಸಲ್ಲೂ ಅನಂತಮೂರ್ತಿಯವರ ನೆನಪುಗಳಿದ್ದವು. ಅವರೆಲ್ಲರೂ ಅನಂತಮೂರ್ತಿಯವರನ್ನು ಯಾವ್ಯಾವುದೋ ಸಂದರ್ಭದಲ್ಲಿ ಭೇಟಿಯಾದವರೇ. ಎಲ್ಲರ ಬಳಿಯಲ್ಲೂ ಹೇಳಿಕೊಳ್ಳುವುದಕ್ಕೆ ಒಂದು ಪ್ರಸಂಗ ಇತ್ತು.  ಸಾಹಿತಿಗಳು, ಕವಿಗಳು, ರಾಜಕಾರಣಿಗಳು, ವಿದ್ಯಾರ್ಥಿಗಳು, ಸಿನಿಮಾ ನಿರ್ದೇಶಕರು, ಪತ್ರಕರ್ತರು, ಇವ್ಯಾವ ಕೆಟಗರಿಗೂ ಸೇರದ ಶ್ರೀಸಾಮಾನ್ಯರು, ಇವರೆಲ್ಲರಿಗೂ ಮೂರ್ತಿಯವರ ಸಾಂಗತ್ಯ ಸಿಕ್ಕಿತ್ತು ಅನ್ನುವುದೇ ಸೋಜಿಗದ ಸಂಗತಿ. ಅವರ ಆರೋಗ್ಯ ತೀರಾ ಹದಗೆಟ್ಟ ಸಂದರ್ಭಗಳಲ್ಲೂ ಅವರು ಜನರ ಕೈಗೆ ಸಿಗುತ್ತಿದ್ದರು, ಕಷ್ಟವಾದರೂ ಕೆಲವು ಸಮಾರಂಭಗಳಿಗೆ ಹಾಜರಾಗುತ್ತಿದ್ದರು, ತನಗನಿಸಿದ್ದನ್ನು ಹೇಳಿಬಿಡುತ್ತಿದ್ದರು. ಅವರ ವ್ಯಕ್ತಿತ್ವ, ಮಾತು, ಬರಹ ಎಲ್ಲದರಲ್ಲೂ ಏನೋ ಆಕರ್ಷಣೆ. ಯಾರಿಗೂ ಸಿಗದ ಒಳನೋಟ. ಅದಕ್ಕೇ ಅವರು ಅನಂತಮೂರ್ತಿ.

ಅವರ ‘ಮೌನಿ’ನನಗಿಷ್ಟವಾದ ಕತೆ. ಅದನ್ನು ಸಿನಿಮಾ ಮಾಡಬೇಕು ಎಂದು ನಾವು ನಾಲ್ಕೈದು ಗೆಳೆಯರು ತೀರ್ಮಾನಿಸಿದವು. ಬಹಳ ಸಂಕೀರ್ಣವಾದ ಕತೆಯದು. ಮೇಲ್ನೋಟಕ್ಕೆ ಇಬ್ಬರು ಬ್ರಾಹ್ಮಣರ ಜಗಳದಂತೆ ಕಂಡರೂ ಅದರೊಳಗೆ ಮನಃಶಾಸ್ತ್ರಕ್ಕೆ ಸಂಬಂಧಪಟ್ಟ ಅಂಶಗಳಿವೆ. ಲೋಭ, ದುರಾಸೆ, ಆದರ್ಶ, ಪಾಪಪ್ರಜ್ಞೆ, ಪಶ್ಚಾತಾಪ, ಪ್ರಾಯಶ್ಚಿತ್ತ, ಗೋಸುಂಬೆತನ, ಮೊದಲಾದ ಮನುಷ್ಯ ಸ್ವಭಾವಗಳು ಒಂದೇ ಕತೆಯಲ್ಲಿ ಸಂಗಮಿಸಿರುವುದೇ ಒಂದು ಅದ್ಭುತ. ಗಾಂಧೀಜಿಯ ಸತ್ಯಾಗ್ರಹಮತ್ತು ಮೌನವೆಂಬ ಪ್ರತಿಭಟನೆಯ ಅಸ್ತ್ರವನ್ನು ಬಹಳ ನಾಜೂಕಾಗಿ ಕತೆಯೊಳಗೆ ತಂದಿದ್ದಾರೆ ಅನಂತಮೂರ್ತಿ. ಇದನ್ನು ಚಿತ್ರಕತೆಯಾಗಿಸುವುದು ಸುಲಭದ ಮಾತಾಗಿರಲಿಲ್ಲ. ಆದರೂ ನನಗೆ ಮತ್ತು ಜೋಗಿಗೆ ಅದೇನೋ ಆತ್ಮವಿಶ್ವಾಸ.

‘ಮೌನಿ’ಯನ್ನುಸಿನಿಮಾ ಮಾಡುವ ಹಕ್ಕು ಕೇಳುವುದಕ್ಕೆ ನಾವು ಮೂರ್ತಿಯವರ ಮನೆಗೆ ಹೋಗಿದ್ದು 2003ನೇ ಇಸ್ವಿಯಲ್ಲಿ. ಸಿನಿಮಾ ತಂತ್ರಜ್ಞಾನದಲ್ಲಿ ನಾವಿನ್ನೂ ಎಳಸುಗಳಾಗಿದ್ದರೂ ಅನಂತಮೂರ್ತಿಯವರಿಗೆ ಅದೇನೂ ದೊಡ್ಡ ಸಂಗತಿಯಾಗಿ ಕಾಣಿಸಲಿಲ್ಲ. ಅವರ ಮಿಕ್ಕ ಕತೆಗಳೂ ಪ್ರಸ್ತಾಪಕ್ಕೆ ಬಂದವು. ‘ಕ್ಲಿಪ್ ಜಾಯಿಂಟ್’ಕೂಡಾ ಸಿನಿಮಾ ಮಾಡಬಹುದಾದ ವಸ್ತು ಎಂದು ಅವರೇ ಸಲಹೆ ನೀಡಿದರು. ಆದರೆ ನಾವು ಮೌನಿಗೇ ಅಂಟಿಕೊಂಡೆವು. ಸಂಭಾವನೆ ವಿಷಯ ಬಂದಾಗ ಅವರು ಜೋರಾಗಿ ನಕ್ಕುಬಿಟ್ಟರು. ನೀವು ನನಗೇನೂ ಕೊಡಬೇಕಾಗಿಲ್ಲ, ಸಿನಿಮಾ ಚೆನ್ನಾಗಿ ಬಂದರೆ ಸಾಕು ಅಂದುಬಿಟ್ಟರು. ಅದಾದ ನಂತರವೂ ಅವರ ಜೊತೆ ಎರಡು ಸಿಟ್ಟಿಂಗ್ ಗಳು ನಡೆದವು. ಮೂರನೇ ಬಾರಿ ನಮ್ಮೊಂದಿಗೆ ಅನಂತನಾಗ್ ಮತ್ತು ದತ್ತಣ್ಣ ಅವರೂ ಇದ್ದ ನೆನಪು.

ಕತೆಯಲ್ಲಿರುವುದು ಎರಡೇ ಮುಖ್ಯಪಾತ್ರಗಳು. ಅಪ್ಪಣ್ಣ ಮತ್ತು ಕುಪ್ಪಣ್ಣ. ಇಬ್ಬರೂ ಘಟ್ಟದ ಕೆಳಗಿಂದ ಜೀವನೋಪಾಯಕ್ಕಾಗಿ ವಲಸೆ ಬಂದ ಬ್ರಾಹ್ಮಣರು. ಮಠದ ವತಿಯಿಂದ ಇಬ್ಬರಿಗೂ ಒಂದಿಷ್ಟು ಜಾಗ ಸಿಗುತ್ತದೆ, ವರ್ಷಕ್ಕೆ ಇಂತಿಷ್ಟು ಗೇಣಿ ಕಟ್ಟಬೇಕು ಎಂಬ ಷರತ್ತಿನ ಮೇಲೆ. ಅಪ್ಪಣ್ಣ ರಸಿಕ, ಸೊಗಸುಗಾರ, ನಯವಾದ ಮಾತಿನಿಂದಲೇ ಎಲ್ಲರನ್ನೂ ಗೆಲ್ಲಬಲ್ಲ ಚಾಣಾಕ್ಷ. ಆತನಿಗೆ ಬದುಕುವ ಕಲೆ ಗೊತ್ತು. ಆದರೆ ಕುಪ್ಪಣ್ಣ ಒರಟ, ಕೊಳಕ,  ಮಾತು ಕಡಿಮೆ, ನಿಷ್ಠುರವಾದಿ, ಎಲ್ಲೂ ರಾಜಿಯಾಗದ ಸ್ವಭಾವ. ಈ ಕಾರಣದಿಂದಾಗಿಯೇ ಕುಪ್ಪಣ್ಣ ಕುಸಿಯುತ್ತಾ ಹೋಗುತ್ತಾನೆ, ಅಪ್ಪಣ್ಣ ಮೇಲೇರುತ್ತಾ ಹೋಗುತ್ತಾನೆ. ಕುಪ್ಪಣ್ಣನ ಪತನವನ್ನು ಆನಂದಿಸುತ್ತಾ ಹೋಗುವ ಅಪ್ಪಣ್ಣ, ಒಂದಲ್ಲ ಒಂದು ದಿನ ಕುಪ್ಪಣ್ಣನ ತೋಟವನ್ನು ತನ್ನದಾಗಿಸಿಕೊಳ್ಳಬೇಕೆಂಬ ಕನಸು ಕಾಣುತ್ತಾನೆ. ಕತೆಯ ಅಂತ್ಯದಲ್ಲಿ ಅದು ಸಾಧ್ಯವಾಗುತ್ತದೆ ಕೂಡಾ. ಕುಪ್ಪಣ್ಣ ಮನೆ, ಸ್ಥಿರಚರ ಆಸ್ತಿಗಳೆಲ್ಲವೂ ಹರಾಜಾಗುತ್ತದೆ. ಎಲ್ಲವನ್ನು ಕಳಕೊಂಡ ಕುಪ್ಪಣ್ಣ ಮನೆಮುಂದೆ ವಿಗ್ರಹದಂತೆ ಸ್ಥಾಪನೆಯಾಗುತ್ತಾನೆ. ಅವನ ಮುಂದೆ ಕೂರುವ ಅಪ್ಪಣ್ಣ ಮಾತಾಡುತ್ತಾ ಹೋಗುತ್ತಾನೆ, ಕುಪ್ಪಣ್ಣನ ಪತನಕ್ಕೆ ತಾನು ಕಾರಣನಲ್ಲ ಎಂದು ಸಮರ್ಥಿಸಿಕೊಳ್ಳುತ್ತಾ ಹೋಗುತ್ತಾನೆ.  ಆದರೆ ಕುಪ್ಪಣ್ಣ ಮಾತಾಡುವುದಿಲ್ಲ, ಅಪ್ಪಣ್ಣನೂ ಕೊನೆಗೆ ಮಾತು ಮರೆತು ಥೇಟು ಕುಪ್ಪಣ್ಣನಂತೆಯೇ ಅವನ ಮುಂದೆ ಕಲ್ಲಾಗಿ ಕೂರುತ್ತಾನೆ.

km veeresh, ur ananthamurthy, jogi, udaya marakini

ಇದು ಕತೆ. ಸಿನಿಮಾ ಸಲುವಾಗಿ ನಾವು ಒಂದಿಷ್ಟು ಬದಲಾವಣೆ ಮಾಡಿಕೊಂಡಿದ್ದೆವು. ಇಡೀ ಚಿತ್ರವೇ ಗಂಭೀರವಾಗಿ ಸಾಗುವುದರಿಂದ ಪ್ರೇಕ್ಷಕನಿಗೆ ಮೊನೋಟನಿ ಅನಿಸಬಹುದು ಅನ್ನುವ ಕಾರಣಕ್ಕೆ ಒಂದು ಪ್ರೇಮಪ್ರಸಂಗವನ್ನು ಜೋಡಿಸಿದೆವು. ಕುಪ್ಪಣ್ಣನ ಮಗಳು ಭಾಗೀರತಿಯನ್ನು ಒಬ್ಬ ಹುಡುಗ ಗುಟ್ಟಾಗಿ ಪ್ರೀತಿಸುವ ಎಪಿಸೋಡನ್ನು ತಂದೆವು. ಅದು ವರ್ಕೌಟ್ ಆಯಿತು. ಅದೇ ರೀತಿ ಕೊನೆಗೆ ಮನೆಮುಂದೆ ಸ್ಥಾವರವಾಗುವ ಕುಪ್ಪಣ್ಣನ ಕೈಯೊಳಗೆ ಕವಡೆಗಳನ್ನು ಇಟ್ಟೆವು. ಬಿಗಿದ ಮುಷ್ಟಿಯೊಳಗೆ ಏನಿದೆ ಎಂಬ ಕುತೂಲದಿಂದ ಅಪ್ಪಣ್ಣ ಅದನ್ನು ತೆರೆದಾಗ ಪ್ರೇಕ್ಷಕರಿಗೆ ಕವಡೆ ಗೋಚರವಾಗುತ್ತದೆ. ಇದು ಕ್ಲೈಮಾಕ್ಸ್. ಆ ಕವಡೆಗಳನ್ನು ಯಾಕೆ ತಂದಿರಿ, ಅದು ಏನನ್ನು ಸೂಚಿಸುತ್ತದೆ ಎಂದು ಚಿತ್ರ ನೋಡಿದ ಹಲವಾರು ಪ್ರೇಕ್ಷಕರು ನಮ್ಮನ್ನು ಕೇಳಿದರು. ಆಗ ನಮಗೆ ನಮ್ಮ ಜನ್ಮ ಸಾರ್ಥಕವಾಯಿತು ಅನಿಸಿತು. ಯಾಕೆಂದರೆ ಇಂಥಾ ಪ್ರತಿಕ್ರಿಯೆಯನ್ನೂ ನಾವೂ ಬಯಸಿದ್ದೆವು. ಒಂದು ಒಳ್ಲೆಯ ಸಿನಿಮಾ ಪ್ರೇಕ್ಷಕರ ಮನಸ್ಸಲ್ಲಿ ಪ್ರಶ್ನೆಗಳನ್ನು ಮೂಡಿಸಬೇಕು. ಕವಡೆ ಅನ್ನುವುದು ಕುಪ್ಪಣ್ಣನ ನಂಬಿಕೆಗೆ ಸಂಕೇತವೋ ಅಥವಾ ಬದುಕಿನ ಭರವಸೆಗೆ ಸಂಕೇತವೋ? ಕವಡೆ ಅನ್ನುವುದು ನಮ್ಮೆಲ್ಲರ ಬದುಕಿನ ನಶ್ವರತೆಯನ್ನು ಹೇಳುತ್ತದೆ ಎಂದು ಕೆಲವು ವಿಶ್ಲೇಷಿಸಿದ್ದೂ ಉಂಟು. ‘ಆ ಕವಡೆಯನ್ನೇ ನಂಬಿ ಕುಪ್ಪಣ್ಣ ಹಾಳಾದ ನೋಡಿ, ಆ ಕಾರಣಕ್ಕೇ ನಿರ್ದೇಶಕರು ಕವಡೆಯನ್ನು ತೋರಿಸಿದ್ದಾರೆ’ಎಂದು ಇನ್ನೊಬ್ಬರು ಹೇಳಿದರು.

ಅನಂತಮೂರ್ತಿಯವರು ಚಿತ್ರವನ್ನು ಬಹಳವಾಗಿ ಮೆಚ್ಚಿಕೊಂಡರು. ನಾವು ಕತೆಯಲ್ಲಿ ಮಾಡಿದ ಬದಲಾವಣೆಗಳ ಬಗ್ಗೆ ವಿಶೇಷ ಮೆಚ್ಚುಗೆ ಸಂದಾಯವಾಯಿತು. ಕತೆಗಾರರು ಸಾಮಾನ್ಯವಾಗಿ ತಮ್ಮ ಕತೆಗಳ ಬಗ್ಗೆ ಬಹಳ ಪೊಸೆಸಿವ್ ಆಗಿರುತ್ತಾರೆ. ‘ಚೋಮನದುಡಿ’ಚಿತ್ರವಾದಾಗ ಶಿವರಾಮಕಾರಂತರು ‘ನನ್ನ ಚೋಮ ಸಿನಿಮಾದಲ್ಲಿಲ್ಲ’ಎಂದು ಕೂಗಾಡಿದ್ದು ನಿಮಗೆ ನೆನಪಿರಬಹುದು. ಆ ಮಟ್ಟಿಗೆ ಅನಂತಮೂರ್ತಿ ಉದಾರವಾದಿ. ಕತೆ ಬೇರೆ, ಸಿನಿಮಾ ಬೇರೆ. ಅಕ್ಷರರೂಪದಲ್ಲಿರುವ ಕತೆ, ದೃಶ್ಯರೂಪಕ್ಕೆ ಬದಲಾಗಬೇಕಾದಾಗ ಕೆಲವು ಬದಲಾವಣೆಗಳನ್ನು ಬೇಡುತ್ತದೆ ಅನ್ನುವುದು ಅವರಿಗೆ ಗೊತ್ತಿತ್ತು.

girish kasaravalli, jogi, nagabharana, udaya marakini, ur ananthamurthy

ಮೌನಿಯ ಕತೆ ಇಷ್ಟಕ್ಕೇ ಮುಗಿಯುವುದಿಲ್ಲ. ಸಿನಿಮಾ ನೋಡಿದವರೆಲ್ಲರೂ ಮೆಚ್ಚಿಕೊಂಡಿದ್ದರಿಂದ ಇದಕ್ಕೆ ಅವಾರ್ಡ್ ಗ್ಯಾರಂಟಿ ಎಂದು ನಾವಂದುಕೊಂಡಿದ್ದೆವು. ಆ ವರ್ಷದ ಅಂತಾರಾಷ್ಟ್ರೀಯ ಚಿತ್ರೋತ್ಸವದ ಪನೋರಮಾ ವಿಭಾಗಕ್ಕೆ ಆಯ್ಕೆಯಾದಾಗಲಂತೂ ನಮ್ಮ ಸಂತೋಷಕ್ಕೆ ಎಣೆಯಿರಲಿಲ್ಲ. ಪನೋರಮಾ ವಿಭಾಗಕ್ಕೆ ಸಿನಿಮಾಗಳನ್ನು ಆಯ್ಕೆ ಮಾಡಿದ ತೀರ್ಪುಗಾರರ ಮಂಡಳಿಯ ಸದಸ್ಯರಾದ ಕೆಎಸ್ಎಲ್ ಸ್ವಾಮಿಯವರು ದೆಹಲಿಯಿಂದ ಬೆಂಗಳೂರಿಗೆ ಬಂದಿದ್ದೇ ತಡ, “ಈ ಚಿತ್ರ ಮುಂದಿನ ವರ್ಷ ಎರಡು ಪ್ರಶಸ್ತಿಗಳನ್ನಾದರೂ ಗೆಲ್ಲುತ್ತೆ ನೋಡಿ”ಎಂದಿದ್ದರು. ಆದರೆ ಅವರ ಭವಿಷ್ಯ ನಿಜವಾಗಲಿಲ್ಲ, ದೆಹಲಿಯಲ್ಲಿ ಪತ್ರಕರ್ತರಾಗಿ ಕೆಲಸ ಮಾಡುತ್ತಿದ್ದ ಕನ್ನಡಿಗರೇ ಚಿತ್ರದ ವಿರುದ್ಧ ಅಪಸ್ವರದ ಮಾತಾಡಿದರಂತೆ. ಇಬ್ಬರು ಬ್ರಾಹ್ಮಣರ ಒಣಜಗಳವನ್ನು ಸಿನಿಮಾ ಮಾಡಿದ್ದಾರೆ, ಇದರಲ್ಲೇನಿದೆ ಮಣ್ಣು ಎಂದು ಅಪಹಾಸ್ಯ ಮಾಡಿದರು ಎಂಬ ವರದಿ ನಮಗೆ ತಲುಪಿತು.  ಹೋಗಲಿ ರಾಜ್ಯಪ್ರಶಸ್ತಿಯಾದರೂ ಸಿಕ್ಕೀತು ಎಂಬ ನಿರೀಕ್ಷೆಯಿತ್ತು.  ಇಲ್ಲೂ ಆಯ್ಕೆಮಂಡಳಿಯಲ್ಲಿದ್ದ ಇಬ್ಬರು ಪತ್ರಕರ್ತರು ಚಿತ್ರಕ್ಕೆ ವಿರುದ್ದವಾಗಿ ಮಾತಾಡಿದರು. ಮೌನಿಯ ಕತೆಗಷ್ಟೇ ಪ್ರಶಸ್ತಿ ನೀಡಲಾಯಿತು. ಆಗ ಅನಂತಮೂರ್ತಿ ನೀಡಿದ ಹೇಳಿಕೆ ಹೀಗಿತ್ತುಃ

“ಮೌನಿ ನಾನು ಹಿಂದೆಂದೋ ಬರೆದ ಕತೆ. ಅದಕ್ಕೆ ಈಗ ಪ್ರಶಸ್ತಿ ನೀಡುವ ಅಗತ್ಯವಿಲ್ಲ. ಅದನ್ನು ಇಂದಿನ ಸಂದರ್ಭಕ್ಕೆ ತಕ್ಕಂತೆ ಬದಲಾಯಿಸಿ ಒಳ್ಲೇ ಸಿನಿಮಾ ಮಾಡಿದ್ದಾರಲ್ಲ, ಆ ಹುಡುಗರಿಗೆ ಮತ್ತು ಚಿತ್ರಕ್ಕೆ ಪ್ರಶಸ್ತಿ ನೀಡಬೇಕಾಗಿತ್ತು. ಆ ಕಾರಣಕ್ಕೆ ನಾನೀ ಪ್ರಶಸ್ತಿಯನ್ನು ಸ್ವೀಕರಿಸುವುದಿಲ್ಲ”.

ಚಿತ್ರಕ್ಕೆ ಅನ್ಯಾಯವಾದರೂ ಚಿತ್ರದಲ್ಲಿ ಕುಪ್ಪಣ್ಣನ ಪಾತ್ರದಲ್ಲಿ ನಟಿಸಿದ ದತ್ತಣ್ಣನಿಗೆ ರಾಷ್ಟ್ರಮಟ್ಟದಲ್ಲಿ ಜ್ಯೂರಿಗಳ ಮೆಚ್ಚುಗೆ ಗಳಿಸಿದ ನಟ ಎಂಬ ಪುರಸ್ಕಾರ ಸಿಕ್ಕಿತು. ನಿಮಗೊಂದು ರಹಸ್ಯವನ್ನು ಹೇಳುತ್ತೇನೆ. ಕುಪ್ಪಣ್ಣನ ಪಾತ್ರಕ್ಕೆ ನಾವು ಮೊದಲು ಆಯ್ಕೆ ಮಾಡಿದ್ದು ಅನಂತನಾಗ್ ಅವರನ್ನು, ಅವರು ಸುತಾರಾಂ ಒಪ್ಪಲಿಲ್ಲ. “ಅಂಥಾ ನೆಗೆಟಿವ್ ಪಾತ್ರ ನಾನು ಮಾಡೋಲ್ಲ, ಅಪ್ಪಣ್ಣನೇ ನನಗಿಷ್ಟವಾದ ಪಾತ್ರ”ಎಂದರು. ಹಾಗಾಗಿ ಅಪ್ಪಣ್ಣನಾಗಬೇಕಾದ ದತ್ತಣ್ಣ ಕುಪ್ಪಣ್ಣನಾದರು. ಅನಂತನಾಗ್ ಲೀಲಾಜಾಲವಾಗಿ ನಟಿಸಿದರೂ ದತ್ತಣ್ಣ ಅವರನ್ನು ಮೀರಿಸುವಂತೆ ನಟಿಸಿದರು. ಜನರು ಕೂಡಾ ಮೆಚ್ಚಿದ್ದು ಅವರ ಪಾತ್ರವನ್ನೇ.

ಅಪ್ಪಣ್ಣ ಮತ್ತು ಕುಪ್ಪಣ್ಣ ಪಾತ್ರಗಳ ಬಗ್ಗೆ ಅನಂತಮೂರ್ತಿ ಹೇಳಿದ ಮಾತು ಇಂದಿಗೂ ಪ್ರಸ್ತುತ. “ನಾನು ಆ ಎರಡು ಪಾತ್ರಗಳನ್ನು ಸೃಷ್ಟಿಸಿದಾಗ ಅದನ್ನು ಎರಡುಪ್ರತ್ಯೇಕ ಪಾತ್ರಗಳು ಅಂತ ಅಂದುಕೊಳ್ಳಲಿಲ್ಲ. ಇದು ಒಬ್ಬ ವ್ಯಕ್ತಿಯ ಎರಡು ಮುಖಗಳು ಅಂದುಕೊಂಡೆ. ಎಲ್ಲರ ಒಳಗೂ ಒಬ್ಬ ಕುಪ್ಪಣ್ಣನೂ ಇದ್ದಾನೆ, ಅಪ್ಪಣ್ಣನೂ ಇದ್ದಾನೆ. ಆಯಾ ಸಂದರ್ಭಕ್ಕೆ ಅನುಗುಣವಾಗಿ ಆ ಸ್ವಭಾವಗಳು ಪ್ರಕಟವಾಗುತ್ತವೆ”.

ಸದ್ಯಕ್ಕೆ ನಮ್ಮ ಸುತ್ತ ನಾವು ಕಾಣುತ್ತಿರುವ ಜನರ ಪೈಕಿ ಹೆಚ್ಚಿನವರು ಅಪ್ಪಣ್ಣನ ಅಪರಾವತಾರಗಳೇ ಆಗಿದ್ದಾರೆ. ಕುಪ್ಪಣ್ಣನಂಥ ನಿಷ್ಠುರವಾದಿಗಳು ಇಂದಿನ ಸಮಾಜದಲ್ಲಿ ಬದುಕುವುದು ಕಷ್ಟ. ಈ ಸತ್ಯವನ್ನು ಅನಂತಮೂರ್ತಿಗಳು ಅದೆಷ್ಟೋ ದಶಕಗಳ ಹಿಂದೆಯೇ ಹೇಳಿಬಿಟ್ಟಿದ್ದಾರೆ. ಸಾಯುವುದಕ್ಕೆ ಮುಂಚಿನ ದಿನಗಳಲ್ಲಿ ಅನಂತಮೂರ್ತಿಯವರು ಪದೇಪದೇ ವಿವಾದಕ್ಕೆ ಈಡಾದಾಗಲೆಲ್ಲಾ ನನಗೆ ಕುಪ್ಪಣ್ಣನೇ ನೆನಪಾಗುತ್ತಿದ್ದ. ಅವರನ್ನು ದ್ವೇಷಿಸುತ್ತಿದ್ದ ಅಪ್ಪಣ್ಣಂದಿರು, ಅವರು ತೀರಿಕೊಂಡಾಗ ತಮ್ಮ ಮಾತಿನ ವರಸೆ ಬದಲಾಯಿಸಿದ್ದು ಕಂಡಾಗ ಚಿತ್ರದ ಕ್ಲೈಮಾಕ್ಸ್ ನೆನಪಾಯಿತು.

ಕೆಲವೊಮ್ಮೆ ಮೌನಿಯಾಗಿರುವುದೇ ಲೇಸು.

Also See

Jnanapeetha Award winner U R Anathamurthy Dead

Uma Column 47 - ಇದ್ಯಾಕೆ ಬಾಸು ಹಿಂಗಾಯ್ತು?

Uma Column 46 - ಮಲ್ಲಿಗೆಯ ತೋಟದಲ್ಲಿ ಡೇಲಿಯಾ ಬಂದು ಕುಳಿತಂತೆ..

Uma Column 45 - ಈ ಸಂಭಾವನೆ.....

Uma Column 44 - ಸೇವಂತಿಗೆ ಚೆಂಡಿನಂಥ ಮುದ್ದುಕೋಳಿ ಎಲ್ಲಿ ಹೋಯಿತು?

Uma column 43 - ಅದು ಸಿಸೇರಿಯನ್ ಅಲ್ಲ, ನಾರ್ಮಲ್

Chitraloka 15th Year Celebration Images - View

Uma Column 42 - ಸ್ಟಾರ್.. ಸ್ಟಾರ್ ...ಎಲ್ನೋಡಿ ಸ್ಟಾರ್

Uma Column 41 - ಇವರಿಗೆ ಯಾರಾದರೂ ಒಳ್ಳೇ ಭಾಷೆ ಕಲಿಸಿ ಸ್ವಾಮೀ

Uma Column 40 - ನಾಯಕ್ ನಹೀಂ...ಖಳನಾಯಕ್ ಹೂಂ ಮೈ

Uma Column 39 - ರಮ್ಯನ ಸೋಲು ಮತ್ತು ಚಿತ್ರೋದ್ಯಮದ ಗೆಲುವು

Uma Column 38 - ಪ್ರೇಮಕತೆಗಳೂ ಕೆಲವೊಮ್ಮೆ ಸಾಯುತ್ತವೆ

Uma Column 37 - ಲೆಕ್ಕ ಪಕ್ಕಾ ಆಗಿದ್ದರೆ ಬಾಕಿ ಚುಕ್ತಾ

Uma Column 36 - ನಿಮ್ಮ ಪಿಕ್ಚರ್ ಸೌಂಡು ಮಾಡಬೇಕು ಅಂದರೆ...

Uma Column 35 - ಕರುಣೆಯಿಲ್ಲದ ಜಗತ್ತಲ್ಲಿ ಜಾಣನೊಬ್ಬನ ಪತನ

Uma Column 34 - ನಗು ನಗುತಾ ನಲಿನಲಿ.. ಏನೇ ಆಗಲಿ

Uma Column 33 - ಬದುಕೋದಕ್ಕೆ ಕಾರಣ ಬೇಕು, ಸಾಯೋದಕ್ಕಲ್ಲ..

Uma Column 32 - ರವಿ ಕಾಣದ್ದು ಮತ್ತು ನಾವು ಕಂಡಿದ್ದು...

Uma Column 31 - ಒಂದಾನೊಂದು ಕಾಲದಾಗ ಏಸೊಂದು ಮುದವಿತ್ತ...

Uma Column 30 - ಕಲಾದೇಗುಲದಲ್ಲಿ ದಕ್ಷಿಣೆಯದ್ದೇ ಪ್ರದಕ್ಷಿಣೆ

Uma Column 29 - ಕಳೆದು ಹೋದ ಬದುಕನ್ನು ಮರಳಿ ಕೊಡುವವರು ಯಾರು?

Uma Column 28 - ದಾಖಲೆ ಬರೆಯುವವರು ಮತ್ತು ಮುರಿಯುವವರು

Uma Column 27 - ಸಿನಿಮಾ ಪತ್ರಕರ್ತರೇ ಪಾಪಿಗಳು!

Uma Column 26 - ಡಿವೋರ್ಸು ಅನ್ನುವುದು ಈಗ ಬ್ರೇಕಿಂಗ್ ನ್ಯೂಸ್ ಅಲ್ಲ

Uma Column 25 - ಡರ್ಟಿ ಅವಾರ್ಡ್ಸ್ ಹಿಂದಿರುವ ಪಾಲಿಟಿಕ್ಸು

Uma Column 24 - ಬಂದದ್ದೆಲ್ಲಾ ಬರಲಿ, ಡಬ್ಬಿಂಗ್ ದಯೆಯೊಂದಿರಲಿ!

Uma Column 23 - ಡಬ್ಬಿಂಗ್ ಭೂತ ಅಲ್ಲ, ಭವಿಷ್ಯ

Uma Column 22 - ಮಳೆ ಹುಡುಗಿಯ ಮರೆವಿನ ಲೀಲೆ

Uma Column 21 - ಕಂಟ್ರಿ ಪಿಸ್ತೂಲ್ ಮತ್ತು ನಕಲಿ ಬುಲೆಟ್

Uma Column 20 -...ವಿಷ್ಣೂ ಎನಬಾರದೇ....

Uma Column 19 - ದರಿದ್ರರ ನಡುವೆ ಒಬ್ಬ ಗಂಡುಗಲಿ

Uma Column 18 - ಮೀನಿನ ಮಾರುಕಟ್ಟೆಯಲ್ಲಿ ಮಲ್ಲಿಗೆಯ ಘಮ

Uma Column 17 - ತಂದೆ ನೀನಾಗು ಬಾ

Uma Column 16 - ಎಲ್ಲರೂ ಮಾಲಾಶ್ರೀ ಆಗುವುದಕ್ಕಾಗೋಲ್ಲ

Uma Column 15 - ಚಿತ್ರೋತ್ಸವವನ್ನು ಯೂ ಟ್ಯೂಬ್ ನಲ್ಲಿ ನೋಡಿ!

Uma Column 14 - ಹಾಗೆ ಸುಮ್ಮನೆ ಕಳೆದು ಹೋದ ಜೀನಿಯಸ್

Uma Column 13 - ಮಲ್ಟಿಪ್ಲೆಕ್ಸಲ್ಲಿ ಸಿನಿಮಾ ಭಾಗ್ಯ ಯೋಜನೆ

Uma Column 12 - ದೇವರಿಗೂ ಬೇಕಾ ಪ್ರಶಸ್ತಿಯ ಕಿರೀಟ?

Uma Column 11 - ಯಾರಿಗೇಳೋಣಾ ನಮ್ಮ ಪ್ರಾಬ್ಲಂ

Uma Column 10 - ತೊಲಗು ಅಂದರೆ ನಾನು ತೆಲುಗು ಅಂದ ಹಾಗಾಯಿತು

Uma Column 9 - ಹಳ್ಳಿ ಹುಡುಗನನ್ನು ಕೊಂದವರ್ಯಾರು?

Uma Column 8 - ಶಂಕರ ನಾಗಮಂಡಲದಲ್ಲಿ ಒಂದು ಸುತ್ತು..

Uma Column 7 - ಪ್ರಶಸ್ತಿಗಳು ಮಾರಾಟಕ್ಕಿವೆ!

Uma Column 6 - ಹಾಯ್ ಕನ್ನಡ ತಾಯ್!

Uma Column 5 - ನನ್ನ ಭಯ ಮತ್ತು ಅಭಯನ ಜಯ

Uma Column 4 - ಭಟ್ರ ಕ್ವಾರ್ಟರ್ರು ಎಂಬ ಸೀರಿಯಸ್ ಮ್ಯಾಟರ್ರು

Uma Column 3 - ಕಲ್ಲು ಕೊರಗುವ ಸಮಯ

Uma Column 2 - ಮುನಿ ಮತ್ತು MONEY

Uma Column 1 - ಜಗತ್ತಿನ ಕೂಸು ಮತ್ತು ಕನ್ನಡದ ಮನಸ್ಸು

ಸಿನಿಮಾ ಪತ್ರಿಕೋದ್ಯಮದಲ್ಲಿ ಉದಯ್ ನನ್ನ ಗುರು - ಜೋಗಿ

Udaya Marakini Column In Chitraloka

Pls Note -

The views expressed in this column are those of its author and Chitraloka or its publishers do not claim to endorse it. You can express your opinion to his e-mail - This email address is being protected from spambots. You need JavaScript enabled to view it.

Raju Kannada Medium PromoLaunch Gallery

https://www.chitraloka.com/movie-reviews/15441-mugulunage-movie-review-chitraloka-rating-4-5.html

Singer S Janaki Gallery